德育及國民教育科諮詢一出台，即有「洗腦科」劣評，教協噚日搞咗個國民教育論壇，教統局官員唔敢現身，好彩還有力撐國民教育唔係洗腦嘅《江山如此多 Fun》過氣榜眼鄧飛站出來舌戰群儒。鄧飛 EQ再高，白鴿黨主席何俊仁一句說話，就令佢即場扯火！

自稱「永遠的異鄉人」
放大圖片

光陰似箭，當年公仔箱內嘅中國常識小子，今日已貴為愛國學校將軍澳香島中學副校長。鄧飛仲步步高升， 7月 1日起做埋教統會成員。難得佢肯出席論壇，在場講者、學生一齊逼佢就國民教育係咪洗腦公開表態。見慣世面嘅鄧飛好玄咁形容自己係「永遠的異鄉人、獨立者」，問大家點解要佢企喺任何一邊？鄧飛仲話莫講話自己嘅學生來生唔想做中國人，就算佢哋今生唔想做中國人，一樣唔會干預，強調洗腦唔係咁易。
鄧飛叫大家唔好睇完《江山如此多 Fun》就以為佢係讀歷史出身。佢話自己都係因熱愛中華民族，先會接觸咁多祖國知識。佢話自己一向支持國民教育，唔只帶學生返大陸，仲會去台灣、新加坡，認識國情同世界，唔會逼學生同佢一齊咁熱愛中華。
論壇期間，何俊仁批評中聯辦宣傳文體部部長郝鐵川早前嘅「洗腦論」時，用德國同日本做比喻，話洗腦科如果好似日本政府干預文部省，喺教科書度淡化侵華歷史，咁就大件事。

不滿以納粹黨做比喻
一聽到呢個比喻，大半場都沉得住氣嘅鄧飛就忽然扯火，好嬲咁鬧阿仁個比喻好不堪，仲話自己對中國都有強烈意見，但係有任何不滿，都唔可以用德國同日本嘅納粹同法西斯主義比喻現代中國喎。
仁哥就笑笑口咁回應，自己唔係要將共產黨比喻為納粹黨，佢只係想講，一個國家如果有動機介入干涉教育就會有問題，希望其他人唔好立亂上綱上線。