補習-政情：李家傑助貧學生讀哈羅

已經係三子之父嘅恒基地產副主席Peter李家傑，尋日出席位於屯門嘅哈羅香港國際學校奠基典禮，佢之所以咁捧場，原來創校人、商人邱德根之子邱達強係佢中學同學，呢份情誼，至今幾十年都依然保存得好好，特登抽空去支持老友不特止，仲帶埋份厚禮嚟添！係乜？一份愛心囉。
哈羅由幼稚園到高中課程都有，學費每年十萬幾到十四萬幾不等，Peter話每年會支持幾個中學生嘅全額學費，只要係香港人兼且嚟自低收入家庭，就算成績唔係最叻都有機會獲得資助。究竟每年有幾多學生可受惠？佢就低調唔肯透露，仲話希望自己三個囝囝，將來可以喺該校讀書。