補習-中環出更：李家傑望三胞胎讀國際校

知識改變命運，唔少有心人都希望可以喺教育方面出分力，捐助成績優異嘅貧苦學生，等佢哋可以專心學業。已經係三子之父嘅恒基地產副主席李家傑 （Peter）向來善心滿瀉，尋日佢出席位於屯門嘅哈羅香港國際學校奠基典禮時，就宣布每年會資助數名學生嘅全額學費，仲話希望自己嗰三個囝囝將來可以入 讀該校添！
Peter之所以咁捧場，原來創校人、商人邱德根之子邱達強係佢中學同學，呢份情誼，至今幾十年都依然保存得好好，所以尋日特登抽空去支持下老友。Peter人到之餘，仲帶埋份厚禮去賀哈羅奠基禮，叫得厚禮當然唔係送個靚靚花牌咁簡單啦，而係送一份愛心畀該校學生。
資助貧苦學生全額學費
哈羅由幼稚園到高中課程都有，學費每年由幾萬元到十幾萬元不等，Peter話每年會支持幾個中學生嘅全額學費，只要係香港人，兼且來自低收入家庭， 就算成績唔係最叻都有機會獲得資助。不過，究竟每年有幾多個學生可以受惠，Peter就低調唔肯透露，佢仲話希望自己三個囝囝，將來可以喺該校讀書。
邱達強就對有興趣申請資助嘅學生大派貼士，佢話Peter捐咗一個開心數目，但要成功獲得資助就要經Peter親自甄選做面試喎。
其實每月負擔到十幾萬元學費嘅家庭，可謂非富則貴，Peter今次資助貧苦學生入讀該校，確能有助基層學生透過優質教育向上流動，充分體現佢對推動教育嘅熱誠。