補習-隔牆有耳：李家傑撐哈羅　三寶留位

學費又貴又巴閉嘅英國哈羅學校香港分校明年創校，八方相信日後一定有唔少富豪後代入讀。噚日學校舉行奠基禮，恒基四叔大仔李家傑話，想三胞胎囝囝都入讀哈羅，以佢同香港創校人邱達強係中學同學嘅關係，預留三個位實冇問題。
貴族學校學費貴係必然嘅，如果李家傑三個仔讀到畢業，估計學費總共要 600萬元，八方聽見伸脷，不過呢個價錢，應該買唔到天匯單位一個廁所。如果佢細佬李家誠兩位千金，同埋快出世嘅細仔第日都入讀哈羅，呢間學校就真係巴閉到極嘞，有六個機會攀入豪門，各位家長有冇為自己同埋仔女打算吓呢？讀香港哈羅唔一定要有錢，因為李家傑承諾捐獎學金畀草根學生。噚日煲呔同孫公出席奠基禮，僭建風暴未平息，兩人在台上面左左，全程接近零交流。