補習-政情：李慧琼嘆教材遭濫發

教育局處理分拆課本同教材搞到一鑊泡，玩殘學生、家長同書商。立法會議員李慧琼（Starry）近日就向深水埗四間中小學收集過剩嘅教材，一秤之下 嚇親人，教材總重量達六百公斤，當中九成為紙製品，造成龐大嘅資源浪費。Starry話，好多教材都用唔着，既唔環保之餘，又將成本轉嫁畀學生家長，無疑 加重生活負擔百上加斤。
原來Starry每個學期都要幫囡囡購買一千元書簿，好似數學書咁，入面有好多練習，要重用就要擦晒佢，所以好難留畀其他人再用，但有啲學科嘅使用 率就好低，可以同一級幾個學生共用都得，此舉可以善用資源。身兼西九龍家長聯會主席嘅深水埗區議員鄭泳舜都好有同感，佢話到依家都仲未能夠落實課本同教材 分拆定價，令到家長被迫「捱貴書」。
話時話，學校有咁多過剩教材，如果將來要學校自己購買，條數都幾襟計，除非政府肯增加撥款畀學校買教材，否則學校到時肯定睇餸食飯，唔會再買咁多教材，損失嘅都係廣大莘莘學子。