補習-理大 75歲　搵歌星贈興

無綫有翡翠歌星賀台慶，大學都潮興搵歌星校友唱歌賀校慶。繼香港大學請咗歌神許冠傑作曲同謝安琪唱校慶歌後， 75歲嘅理工大學，明年年頭到年尾都有一系列慶祝同籌款活動，到咗出年 11月將會有重頭戲校慶晚宴，擺返七八十圍。雖然規模無港大百周年今個星期日擺校慶晚宴 365圍咁大，但陣容一啲唔輸蝕。
有冇乜嘢政界大臣就未知，但校長唐偉章話，將會邀請一班校友歌星到時獻唱助興，包括有梁詠琪同楊千嬅，仲有今年讀 Year 1嘅超級巨星何雁詩。咁嘅陣容，可以同謝安琪隔空鬥一番。唐校長那些年都曾經係一個好 rock嘅夾 band之人，由佢出馬 jam番首歌，應該好有吸引力。