香港幾間大學學術水平達國際級，學生品酒水平亦躋身國際水平。中大品酒學會三個學生月中出戰法國「 20 sur vin」葡萄酒鑑賞國際大賽，首度參賽，僅以一分之差敗於哈佛商學院得亞軍，力壓雙季軍荷蘭奈爾洛德商業大學及美國 Wharton School。

呢個大學生品酒大賽由法國多個波爾多酒莊合辦，今年第 10屆，共有八間大學參賽，首度邀請亞洲區大學生比賽，香港同新加坡代表分別係中大品酒學會同南洋理工大學。比賽本月 17日喺 Lafite酒莊舉行，評判包括著名食家 Wilson Kwok。
三個中大學生 Fergus、 Holly同 Alex，出發前緊密操練，比賽有四個環節，首先考 10條選擇題，關於釀酒、葡萄酒貿易等知識，中大答啱九題。第二部份係分辨三杯紅酒新舊同產區，帶隊嘅中大校董、學會贊助人 Raymond話中大喺頭兩項攞最高分領先，評判都甚為驚訝。
第三個環節係試酒後形容風格、講出產區、年份，最後係試兩杯 Sauternes甜白酒，亦要講出產區、年份。 Raymond話三個中大學生都係讀 Law，因此有得溫書嘅選擇題成績較好，與外國學生比較，品酒火候未夠難免輸蝕，不過總成績只係差冠軍哈佛一分，擊敗劍橋同法國大學生，加上三人係最年輕參賽者，絕對雖敗猶榮。
亞軍獎品係兩支 99年 Lafite佳釀，好矜貴？未算，因為參賽者獲 Lafite莊主 Baron Eric de Rothschild邀請在酒莊共晉晚餐，咁至巴閉嘛！中大品酒學會去年成立，係香港首個大學生品酒學會，校長沈祖堯係名譽會長。英國牛津、劍橋都有品酒學會，歷史逾 200年，開辦專業課程，地位崇高，係非一般學生會。