暑假將至，政府同教科書商就分拆教材嘅拉鋸戰愈黎愈埋牙，教育局局長孫明揚同一眾教科書商代表尋日又上立法會過招，素有橋王之稱嘅孫公，自從拋出不排除招標嘅說法後，就強勢領導呢場戰事，以尋日會議為例，一邊有家長代表圍剿書商代表，一邊又有議員拋租借舊書等舊橋添亂，最絕係孫公，佢猛向學校派定心丸，嗌佢哋先利用盈餘墊支購買教材，然後教育局至撥款畀佢哋，可惜班議員質疑孫公會唔會係彈弓手，對佢好冇信心，鬼叫政府周不時大石壓死蟹，搞到人人心驚膽跳咩！

唔知邊個行第一步

原本領導教科書分拆嘅係教育局副局長陳維安，佢過去多次態度強硬，高姿態咁話唔會向學校提供「專款專用」購買教材，因為唔想為書商包底，結果激嬲學界，最終搞到家長不滿、學校不滿、出版商不滿，多面受敵。

新學年市場上只有百分之八新版書做到分拆訂價，孫公上場，就扭轉做法，叫學校先利用盈餘墊支購買教材，當局之後再會進行調查，研究學校平均需要幾多錢購買教材，再採滯後付款方式向學校撥款。

教育界立法會議員張文光即刻喺立法會上質疑孫公：「教育局會唔會彈弓手，要學校畀錢先，之後當局唔知使唔使找數呢？」王國興更批評政府對分拆教材嘅建議簡直係「雞同雞蛋嘅問題」，佢質疑：「如果出版商唔分拆，咁教育局又點調查學校夠唔夠錢買教材，以及撥幾多錢畀學校呢﹖依家大家推嚟推去，學校着急、家長着急、政府冇符……」講嚟講去，就係唔知邊個行第一步，呢一鋪，唔知多橋嘅孫公又點拆呢？