補習-政情：廖潔明囡囡揚威畫壇

本港再有多名學生及老師喺世界級嘅繪畫比賽勇奪重要獎項。喺歐洲一個繪畫大賽，其中一名得獎者原來係前警務督察協會主席廖潔明嘅十七歲女兒廖韻怡，佢參加有「畫壇奧運」之稱嘅馬其頓國際青少年及兒童繪畫賽中，與其餘兩名本港女生同時獲封為全球十大最佳青少年畫家獎。
廖家出咗一位少女畫家，廖Sir當然好開心，佢話同許多家長一樣，喺囡囡細個時已安排佢學芭蕾舞、鋼琴同畫畫，睇吓佢對乜嘢有天分同興趣，最後囡囡鍾意畫畫，就一直學到依家。

廖Sir同太太對培育子女有一套睇法，就係希望佢哋喺學業以外，對最少一項藝術及一項體育產生興趣，認為咁會令佢哋終生受用，因為佢覺得做人應有均衡發展，咁至會有更多姿多采嘅人生，佢自己本身就愛唱歌，唱男低音，以前因警協忙碌而暫別合唱團，佢喺九月二日正式退休後，除咗積極考慮參政外，亦會發揮自己喺唱歌方面嘅所長，到時大家或有機會，欣賞到廖Sir嘅歌喉。