補習-政情：港大校慶與昂山「對話」

緬甸反對派領袖昂山淑姬將會有機會透過視像會議同香港人作近距離接觸，事關港大百周年校慶活動「百年．對話」，下星期一（三十日）請嚟嘅第八位嘉賓就係佢。為咗隆重其事，社會科學系院長何立仁親自去緬甸做準備，至於香港就由陳祖為教授打點。

機會千載難逢，據講已有一千名港人報名參加，會獲安排到港大陸佑堂透過視像會議同昂山淑姬對談交流，但陸佑堂只得八百個座位，所以向隅嘅朋友就要喺第二度睇轉播喇。今次交流陳祖為教授負責幫參加者發問，相信大家都好想知昂山淑姬為理想要同家人分開、對緬甸民主路嘅睇法，當然唔少得問佢喺經濟同政治方面，中國可以扮演乜嘢角色啦！