新一屆政府上任半年多，幾個官場新丁都過晒試用期，各人表現自有外界品評，值得一提嘅係，教育局局長吳克儉喺呢段時間就多咗個「吳得掂」嘅外號。近日，吳得掂局長又因為一班反國教嘅家長出書成為焦點，雖然佢日前出席傳媒春茗時已主動揸貓紙回應，但尋日出席電台節目後又被追問件事，今次吳得掂依然按官方定調背書，小心翼翼咁重複日前嘅說話，睇嚟，官場新錄音機真係非佢莫屬！

自從日前出書嘅家長爆出有關鄭希喧嘅事件後，吳克儉就不停被人追問，無論件事係政治內幕，定係出書呢個商業行動嘅宣傳招數，件事都被有心人炒熱咗，吳克儉都冇晒符。日前佢就主動話要回應，但就毫不顧忌當住記者面前攞貓紙照稿讀。事隔一日，尋日佢再次回應事件，今次唔使再摷貓紙，但一字一詞同日前冇乜分別，似乎已經死記硬背了答案。
否認受任何壓力或干預

不過，吳得掂都強力反擊受到干預嘅揣測，佢話有關國教決定嘅整個過程都係香港教育嘅內部事務，佢冇覺得有任何其他唔同嘅指示，呢個決定係來自香港業界同相關持份者，佢仲斬釘截鐵咁話：「我完全不覺得有任何壓力、干預或意見給我，沒有這情況出現」。

熟悉政府運作嘅人都知道，對於一啲敏感嘅事件，政府高層以至整個對外口徑就會設下一個既定答案，官場中人對呢套運作好熟悉，吳得掂今次扮錄音機都係劇情所需，不過，做錄音機要搞到摷貓紙，佢似乎有必要向前任高官學嘢啦。